10 باسم الله بديت

- طلعت للغابة، صبت الضّرو يابس، قتلوا يا ضرو القمر يمشي ولا حابس، قالّي مفرش زربية وحذاه طاوس.
- رشّيت عتبة الباب بالزهر والطّيب، وسقيت كل الأحباب بالعسل والزبيب وكى نسيت جاني جواب كنت نستناه من عند البعيد.
- مدّيت لقاع البير وفرّشت زربية، حرقست حرقوس ذهب من راسى لوذنية، فرحي يا يما سعدى زها.. واستشفاي في العدو إلى استشفي فيّ.
- يما يما ديريلي تويقة في وسط الحديقة باش نشوف زهرى كي تجيبو ذيك الوريقة.
- الدالية دلات.. ودلّ العنقود، خلي القمر ينكشف، والسحاب يذوب، وخلي لالات النسا تنال المرغوب.
- خرجت نهار الجمعة، في يدى شمعة، قالولي أمسحى ذيك الدمعة، وانساي الخلعة، قريب يتلموا احبابك وصحابك ويفرحوا معاك الجماعة.
- الناس تنده بالرجال والوالي، وانا ننده بربي العالي.
- حوم حوم يا حوام، حوم فوق السطح العالي، وقول لها يا لآلة يا زينة لبنات وخدودها براقة، وعيونها غرّاقة، صارت كل القلوب ليها سبّاقة.
- كلام على كلام والكلام على سقيلة، العين في العين والدّعوة مقبولة.
- يا شمس واش بيك ذابلة، إلا بيك الزين راني نفكر فيك، واذا بيك الزهر ربي ما يتخلي عليك.
- محبس منقوش، مربي على الفشوش، ما يحمل الهانا، أصبر يا خاطري حتى يفرّج مولانا.
- لزّيت لباب الرياض، الورد عالباب النرجس باسني، الزهر عنقنى، والياسمين ما بغَى يكلمني.