تفاوت نالعيد اغزر انلمزاب

مع وتاف نالعيد ابزان ادوقدى نيور نوزومي اناف قاع توات ادوس يلا تمورا اخدم انغ اعزام اتوط غال وغلان اوسقضع نالعيد يد اتغرسان دتواتس. توني دقن النعمة زذغ تلا تقم ات اغرسان مان مدان زذغ الان اطفان دبعضهم مع ازدي ندامان دالقلت انيت نتواتس دات غرسان اول يلا يدجوج اسوغلان ادوجد امان ادلعوين باش ادوط غال وغلان ادملاقة يد امدتشلس ادمدانس.
اماشي تلا دن اقت العادة تضضت ايتبهى دين املاقة انتروى انتعشيرت اس فيدسن نالعيد تدارت تزعلوكت دقت المناسبة اتملاقان دس قاع مدان وس يلا اغلان انغ وس يلا التل باش ادسنان بعضهم اسنان انلان دجديد اغلان.
املاقة نتواشولين فمار دقت الفرصة دخ نومودي نقن لمعاش ايتوسان اسس اغلان دين اشو يلا وس اتمودات دوشو ادوينو يلا وس اشو اتفسناغ امبصح دم لمعاش اتخيران ات اغرسان المناسبات دين اشو دبسون ادس.
يلا وس يدجور غال الغابة مان لوسع دتجموين اوسقضع نالعيد دوملاقة انقاع نتواشولت اتاسان سكل انشان.
العيد ابزان اغلان نبكري اولجي انالعيد نماروا اتوتساس تملا يغلب انلعوايد قضعنت مان احبو نتغرم انغ الحضارة فتمدورت انمدان الان تبعان اجديد اتان اكبور دلعوايد نمزوار الان دالساس دالدين دالشريعة.