اسدر نالمولود تم نوغلان

اسدر نتلالت نوسر نيوش امقران اسن 12 ربيع الاول اغلان غرس اقت تملا وحدس مان قاع تمجيدوين اتشارنت اسمدان اتاسان سالتل ادوغلان باش ادحضرن تفسكوين نوسدر نيض نالمولود اموني اسوعزام انلبيات اسونجمان السيرة نيوش امقران دالاخلاقس دوسولغ انتشليس غال امزانان باش ادجورن ابريدس..
اسونجم دوسدر نوس نتلالت نوسر نيوش امقران تزاليت غفس دسلام تمو نوغلان اولجي انموشان اضضنين تمورنتغ اتان يغلب نلعوايد نبكري اسونجم نوسدر نوس نتلالت نوسر نيوش امقران اتقم غير اسقاس نالحريق ادوشعال نشموع.
تفسكوين بدانت اغلان مع تمديت مان تمجدوين بدانت اتوجدنت اسدر نوس سوززدق نالحالة سوشعال نضواوات مع افراض نغولاد دبريدان.
دفر تنضاس ادبدان مدان تالين غال تمجيدا تكبورت اجانا نوغرم مان ادعزمان دس القصيدة نالبوردة الان دقت القصيدة تساول ستمدورت دالسيرة دالاخلاق نوسر.
الوالدين تاوين ادسان ترونسان امزانان غال تمجيدا تزعلوك باش ااطفان دلعوايد ايجورن ابريد نمزوار.
اماشي اتملاقانت تواشولين تدار اسونجمان دغنتنين اضنسنت اموني سوشعال نشموع تالسان دس تمدورت نوسر نيوش دتمدورت لالاحليمة الان تربى محمد داماشي ادتشر دنوجيل دفر تماتانت نالوالدنس انت دبازان.
اغرم نات ازجن دقن سغرمان اغلان الان زدغ الان اطفان دالعادة نوسدر نوس انوني اموني سقت العادة لاش المثالس اغرمان اضضنين تسناسد قاع تروى نات ازجن سايولوا تمو ندزير.
دفر تزاليت نتسمسين ادملاقان امزانان مع الوالدننسان اتشمران ادسان انيران نالزيت اتحوفان مع ابردان مولودْ النبيء محمّد المصطفى السراج المنير صلّى الله عليه وسلّم اتاوين نير نالزيت غال ايولوا اموشان مان تفسكوين تقمانت ال تزاليت نتنضاس بعدس ادتوصوضاف المعروف اماس نتمجيدا دفر توتروين دتزاليت فوسر نيوش امقران.
اسدر نوس نتلالت نوسر نيوش امقران دقت العادة الان زذغ مدان اطفان دس امار انوشار نمناوت ترباعين ادزاقانت سالقلت نوسونجم انيض نتلالت نيوش دوفكرس. وني دقن وس ايبهى دقت المناسبة الان دس اقن ارازان دزعلاك اناف قاع مدان اتزالان فالرسول الان يلزم اسونجم نوسان الان خصان يغلب.