الخبرة في الصك

وقال بحليطو: التقيت صديقي الحمار بقاعة الانتظار لمطار هواري بومدين، وقلت له: واش صاحبي؟ معول تعطيها لأوروبا وما ترجعش وتهاجر كيما هجروا كل الأدمغة؟ وقال لي: ربي يهديك، كاش ما بقاو أدمغة في هذا الوقت؟ رانا في زمن الأرجل وأنا رايح لكرانس مونتانا· وقلت له: ما تقوليش استدعاك سعدان، وأنا شفت قائمة الخمسة وعشرين وحتى قائمة الثلاثين ولا أثر لاسمك أنت الحمار بن الحمار·· وقال: صح الشيخ البكاي حفرني وما استدعانيش رغم العشرة والملح إلا أني حمار وطني وعندي كرامة ورايح على حسابي الخاص نحضر التربص ونقدم بعض النصائح للاعبينا حتى يحمروا وجوهنا في المونديال، وقلت له وأنت واش تعرف في لعبة الأقدام إلا الصك؟ وقال: وعلاش تستهزئ، والصك حاجة قليلة؟ على الأقل مع الإصابات الكثيرة وغياب المنافسة لكثير من اللاعبين أنصح الشيخ البكاي الاستفادة من خبرتي ويستخدم سلاح الصك في الوقت المناسب حتى نتجنب خسارات كبيرة مع الفرق القوية·