الدنيا غير هبوب

إشراقات زينب

- من المجموعة الجديدة
بالهْوا والريح الفايْتا
يعمروا في الڤصب الراشي
ناسيين بلّي
الدنيا غير هبوب
واقفا بين شروق وغروب
تتشهى عين تشوف
وَاشْ تخبَّى بين الرّفوف
تفتح كتاب اللّولين
وتخطفْ لمْعة حكمة
فَلتتْ ما بين همّْ وغدرا
هْنا الليل تْلف نعاسو
والنهار ما عْرف كيف تعرى
ورْمى على غفلة
وسط الناس لباسو
حتى الهوا ضاق به الحال
عاد وسط الناس دهشان
والدرويش غير سْها على ظله
فلتت منه العصا
وسط الهول تعرى راسو
هو وحده شاف الما
ينشف ويجمد فالسما
والسوس ياكل في عروق الشجرة
شاد بقلبه ويديه على الجمرة
مخبي النجوم خايفها لا تطفى
يخيط بالشوك
الجرح لي عمره ما بْرا
يْعيط عْياط المجدوب
وين الملح وين النار
وين العشبة الخضرا
في باب المدينة
لتم الغاشي
قالو هذا مهبول
فاقد العقل والقول
شافوه فالسر يغزل فالما
يخط فالرمل
ويرسم جناح للمعنى
بين يديه السر يتجلى
يسمو ويعلا
ما يوقفو لا غيم ولا سحاب
ولا شمس مفتتة
بين اللرض والسما