أنا كيفك

يا النحلة،
ما عندي غير لعسل-
نڨطَع بيه حديث الحاڨدين.
2-
أنا كيفك يا السّاڨية،
بلاد الشوك-
مشيتها حفيان.
3-
أنا كيفك يا الغابة،
كي يعرّيني لخريف-
تغطّيني السما.
4-
أنا كيفك يا الشلاّل،
نطيح من عالي-
ونكمّل نحلم.
5-
أنا كيفك يا لبحر،
اللّي يموت ف ڨلبي-
يكنسو المُوج.
6-
أنا كيفك يا النّو،
كان دمعي صافي وحلُّو-
قبل ما يتبّع جُرّة مالحة.
7-
أنا كيفك يا الباب،
وجهي الدخلاني-
عمرو شاف برّا.
8-
أنا كيفك يا العشوات،
حزني اللّي ماطيبانو شمس اليوم-
نعاودو غدوة.
9-
أنا كيفك يا الصُمعة،
كل جمعة
نطلّع في دعوات النّاس لربّي.
وأنا ڨلبي معبّي دعوة،
ڨريب تولّي صلاة.
10-
أنا كيفك يا التران،
هذا التخربيش على وجهي
كان بروح وألوان-
خلاّه مُسافر فيّ...
هبطْ قبل..
التارمينوسTerminus.