اللي يذوق البنة..

ألو.. شكيب صح عيدك واش راك عيدت مليح؟
أواه يالكحلوشة.. أنا دائما نعيد مليح واش يخصني.
قلت بالاك الخرجة الجديدة تاع فريد بجاوي قلقاتك راه يقولك كان يعطيك الدراهم في يدك صح هذا الكلام ولا راه يكذب؟
لالا صح كان يعطيهم لي في يدي بالصح عندو شاهد على كلامو؟
ماعلاباليش يا السي خليل أنت تقول إلى عندو ولا ماعندوش.
أواه راه غالط بزاف بزاف إلى عمبالو أنا نطيح في الشبكة كما هو راه بعيد على الحقيقة أنا كما القط نطيح دائما على رجليا ماشي كما هو جابوه على راسو.
أنت ما طيحش راك محترف فالسرقة؟
طبعا أنا درت ستاج طويل من بعد دخلت عالم الاحتراف عمبالك أرواح واسرق لالا راه فن كبير وصعيب وواعر ولازم يكون قلبك حديد باش اديري واش درت أنا.
صح أنا مجرد التفكير فالموضوع يوجعني راسي.
همالا ريحي فالمقالات تاعك راكي مليحة أحنا نسرقو وأنت اندبي حناكك.
واش راك مقرر أدير في الأيام القادمة؟
أندير كما الناس نستنى أشكون هو الرئيس؟
وأنت علاش ياخي أنت مواطن أمريكي واش راحلك أشكون يحكم الجزاير؟
قهقه عاليا وقال.. كيفاش واش راحلي نسيتي بلي مازال الدراهم فالجزاير ومازال البترول لازم نشوف كيفاش انديرلهم.
قلت.. رايح تكمل على واش بقا؟
طبعا طبعا اللي يذوق البنة ما يتهنى أنا شكيب يا الكحلوشة وأنا ذقت العسل الله غالب يا الطالب.