الاستعمار

السي بوكريشة رئيس البلدية، يحضر خطابا ثوريا بمناسبة يوم المجاهد الموافق للعشرين من أوت لكل سنة، ومن كثرة المعلومات التي يكتسبها هذا الأخير كونه مجاهدا كبيرا، فقد تأخر نوعا ما في تحضير الخطاب ريثما يسترجع أمجاد الماضي وذكريات الثورة التحريرية، فأرسل البراح من أجل تحسيس الناس بهذه المناسبة العظيمة، وجمعهم في ساحة البلدية كما جرت العادة .
*
البرّاح
يا ديوان الصالحين يا ديوان الصالحين
يا ديوان الصالحين والخاوة المجاهدين
هاذ لبلاد أحنا جبناها واحنا فرانسا خرجناها
ياك نحينالها يماها وما كناشي ساكتين
بالمكحلة الي رفدناها الطيارة قلبناها
وزدنا لمدافع معاها وما كناشي خايفين
وحد الصبحة القايد بكر قال الحالة ماهي تشكر
عالفيلاج زدمت العسكر كي حنا كنا راقدين
كلينا حبة حبة سكر وزدمنالهم للمعسكر
ياو درنا فيهم المنكر و عشينا هاربيين
عاودنا للجبل ولينا جات فرانسا زدمت لينا
قتلت الي قتلت فينا الله يرحم السابقين
رحنا لراس لجبل طلعنا اتفاهمنا وجتامعنا
نحوسوا شكون الي بيعنا بربي رانا حالفين
حلفنا غير نخلفوا الثار ما يبردشي الدمار
حتى شنا الاستعمار في لبوابر رايحين
لتم ادينا الاستقلال وهبطنا الكل من لجبال
كنا فالعدد قلال وليوم رانا حايرين
لقينا واحد العيباد قالك اخوة الجهاد
قال هوما حرروا لبلاد ما راناشي فاهمين
الديسكور
صباح الخير يا وجوه الخير، ونشاالله تكونوا الكل بخير، نتمنالكم عشرين أوت سعيد، والله يرحم كل شهيدة وشهيد، وكل مجاهد نتمنالو العمر المديد، سواء كان مجاهد قديم أو جديد، وكاين العديد من المجاهدين الجدد، وعددهم كل يوم يزيد، وكل يوم نشوفوا المزيد، المهم نشاء الله خطابي يكون مفيد، ويلخص تاريخ ثورتنا المجيد، ويكشف العديد من الي وجوههم نتاع لحديد، الي الاستعمار ردوه استثمار. وأنا رايح نحاول نكشف ليستوار فيريديك نتاع الطرافيك والكذب والتنوفيق نتاع بعض الانتهازيين خارجين الطريق، الخونة الي كانو يبيّعوا فالخاوة.
المهم أنا كمجاهد كبير، نتذكر واحد المرة في وقت الثورة، كنت مع الخاوة، وما يخفالكمش بلي كيما كانوا الخاوة كانوا الخونة، وأنا فقتلهم نهار حوطّت علينا فرانسا فلومبيسكاد، قبضونا وأداونا للكونفري، وعذبونا عذاب ما يتصوروش لعقل، قالولنا الي ما يبيّعش الخاوة نقتلوه، وصحّ كانوا الي ما يقرش يقتلوه، والحاجة الي حرت فيها اني لما سرحوني، خرجت لقيتهم برّا، ومادام الي ما يقرش يقتلوه، وهوما طلقوهم !!! حب يقول هوما قرّوا وبيّعوا ... قوميّا فا ..
وأما بالنسبة للمجاهدين الي راه كل يوم عددهم يزيد، وكل يوم تسمع مجاهد جديد، مثلا ... كاين الي كان يمشي فالطريق طاح زلق تفلق خرجتلوا سيكاتريس في راسو حصلّها في فرانسا، قالك عذبوني ...
وكاين الي عضّو كلب قالك هاذي التريسينتي نتاع الطورتير نتاع فرانسا !!!
وكاين عيباد أنا ما شفتهمش في وقت الثورة، كانوا مغطيين راسهم بالزاورة، ونهار ادينا الاستقلال خرجوا لبرا، يجروا فالزنقة ويديروا فالسمير فوق الطروليات والتراكتورات، والبعض الاخر كانوا بياعين ونهار الاستقلال زدموا على الفيلات والقصور، واداو البيانو والبيبيوتيك والتيساف وترفهوا في هاذيك الضربة، ومن بعد خدموا لكواعيط بالطرافيك، وجابوا شهود الزور، وعادوا يدّوا البونسيو نتاع المجاهدين، والاستعمار ردوه استثمار والثورة ردوها ثروة، وراهم اليوم عايشين بالكذب والهف على ظهر المجاهدين الحقيقيين، وعلى ظهر الزوالية المتمرمدين، ولهذا راني قررت نعاود التحقيق بالتدقيق ونكشف صحاب التنوفيق، خارجين الطريق، الي راهم عايشين على ظهر الزوالي المسكين، وعلى كل حال نصهم راهم مرضى بأمراض مزمنة، وراهم يتعذبوا فالدنيا قبل من الاخرة، وربي وكيلهم، وعليهم دعوة هاذ الشعب المغوار والمجاهدين الثوار والشهداء الابرار، ونشاالله واحد فيهم ما يموت موت ربي، الكل يموتوا بامراض خبيثة كيما هوما خوباثا،وما يربحوا لا فالدنيا لا فالاخرة، ونغتنم هاذ الفرصة باه نرفلهم دعوة خالصة من فوق المنصة، وكاملين قولوا آمين: البياعين دوك الراسة الي كانوا يبيعوا لفرانسا، نشا الله معيشتهم تولي قارصة، ونشاالله روسهم تولي فرطاسا، و فرجلهم تنوضلهم داحوسة، ويحكمهم عرق لاسا، وولادهم يردوبليو فالمدرسة، وجيوبهم تولي مفلسة، ودراهمهم ياكلوهم النسا، ويعودوا يطلبوا بالطاسا، وتخرج فيهم دعوة الشعب الي قاسا، ونشاالله كي يموتوا فالمقبرة ما يلقاوش بلاسة، آمين يارب العالمين ...
قصة وقصيد
يمكنكم المشاركة في ركن (قصة وقصيد) للصحفي فيصل كرشوش الذي يستقبل قصص القراء بما تحمله من هموم وانشغالات ويحولها بدوره الى قصائد شعرية، ويفتح لكم المجال من أجل المشاركة بنصائحكم وتجاربكم وأفكاركم وقصائدكم الشعرية لمساعدة الآخرين ورفع الغبن عنهم.
" محمد " صلى الله عليه وسلم
بعدما تابعتم في العدد السابق أول جزء من القصيدة المحمدية التي تختصر قصة خير البشر سيدنا محمد صلى الله عليه وسلم، والتي نستعرض فيها بعض مناقبه وشمائله ومحطات من حياته الشريفة عليه أفضل الصلاة وأزكى التسليم، وهي قصيدة من أربعة أجزاء.
*
القصيدة المحمدية
*
الجزء الثاني : بداية الوحي والتبليغ
حتى نهار الله كمّل لو ربعين عام وبدات تظهر
المبشرات والمنام يخرجلو ويسمع التسبيح تاع لحجر
ولما يفوت الشجر يسجدلو ويسلم عليه وهو لا خبر
أنو ربي سبحانو وجدلو أكبر رسالة بعثها للبشر
حتى نهار جبريل خرجلو فغار حيراء وشدّو مالظهر
وقال لو اقرأ نبينا ردلو ما أنا بقارئ وجبريل يكرر
ثلث مرات من بعد قرالو سورة العلق حتى للآخر
كأنو جاوبو على سؤالو شكون الخالق وردلو لخبر
نبينا هبط يجري لأهلو خايف مدهوش أو متوتر
طلب من خديجة باه تزملو وتغطيه كامل بالزوّر
ولما فطن لقاها قبالو قاعدا تونّس فيه وتصبّر
حكالها كامل واش صرالو وقال لها .. انا النبي اللّخر
ما حبتش تدخلّو في عقلو قاتلو خديجة وعلاه حاير
اذا ما كنتش انت رسولو مستحيل يكون وحداخر
صادق فالكلام الي تقولو ولا عمرك تعمل الشر
تحب الناس، الرحم توصلو وما تاكلش حق وحدوخر
والي يجي يقصدك تمدلو و بابك ديما مفتوح للآخر
اشهد انك عبدو ورسولو ونروح ملدرك نبدا نبشر
راحت عند ورقة حكاتلو قاللها ياريت انكون حاضر
فالنهار الي يخرجوه اهلو نوقف معاه حتى للاخر
وأبا بكر لما راحتلو الي كان صاحبو تاع لعمر
ما خلاهاش حتى تكمل لو شهّد قبل ما تكمّل تهدر
من بعد ربي زاد نزل لو المزّمل والمدّثر
وأمرو يقوم ينذر اهلو صحابو لقراب غير فالسر
ثلث سنين وهوما يصلّو بالتخبية على وحداخر
حتى نهار ربي بعثلو ونصرو بتوبة سيدنا عمر
لتم بالذات الي وحالو وقال لو اصدع بما تؤمر
حمزة فيمينو وعمر فشمالو وشكون فقريش يقدر يهدر
ما بقالهم غير يسمعموا لو والي حب يآمن وإلا يكفر
فعز نّهار يمشي على رجلو ولتم الإسلام بدئ ينتشر
كثير ناس فالإسلام دخلوا وكثير منهم الي بقى كافر
خايف عالحكم إذا يروحلو ولاّ خايف تجارتو تخسر
لتم قريش بداو يعتاقلوا ويعذبوا كل مسلم يظهر
قدام عينيه يقتلو أهلو ماعليش صبرا يا آل ياسر
ونبينا ما كانوش يدناولوا خاطر عمو كان فيه ينصر
ويقول واحد فيكم ما دخلو يعبد وش حب وهو حر
عمّو أبي طالب ماتلو وكان قبلها عمرو تنحقر
منهار مات قريش تبدلو او قابلوه بوجه وحداخر
او عادوا يعذبو او يقتلوا كل مؤمن فطريقهم يظهر
حتى نبينا او لحقولو ولاّو يرغموا فيه باه يكفر
المسلمين بداو يفشلوا وسيدنا محمد بزاف نضّر
ولحاجة الآخرة الي كملتلو ماتت خديجة حبيبة لعمر
يتبع ...
مسابقة ناس الدشرة
كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة ويريد نشرها في الجريدة.. للمشاركة في مسابقة ناس الدشرة والفوز بجوائز قيمة، لقرع بوكريشة يضع تحت تصرفكم وسائل الاتصال المدونة أسفله.
نكت
المعاكس
كان واحد يعاكس فوحدة فالطريق، قالتلو ما تهدرش معايا فالطريق، قاللها ماعليش نطلعوا للطروطوار .
نسرين / باتنة
خير
قالك واحد كانت رايحة تولد مرتو، وتفاهموا اذا ولد يسموه خير الدين، وإذا طفلة يسموها خيرة، امالا زاد ولد مزعوق مزعوق .. سماوه خير من والو ..
زينب / العاصمة
المسمار
قالك واحد مسمار ( بخيل ) وموسخ بزاف حب يتحمم، در روحو ميّت وجاو الناس غسلوه، وكي رفدوه وبداو هوما يقولوا ( لا اله الا الله ) وهو يقول ( أو تحميمة تاع الله ) .
محمد . ر . ع / وسارة
المعلم
قالك واحد المرة دخل المفتش الى أحد الأقسام فوجد المعلم نائم، وفجاة استيقظ المعلم فوجد المفتش أمامه، فقال للتلاميذ : هكذا كان عمر ينام .
فاروق محمد الصغير
الكبش
زوج كباش كانوا مع بعضاهم ... الأول قال : بااااااااع ... قالوا الثاني : آمن ولاّ ريّح نحيتهالي من فمي ...
عادل / الجزائر
كباش العيد
يامات العيد لكبير، خروف قال ليماه : مامااااع وين راح بابااااع؟ ... قالتلو تباااااع .
رضا / العاصمة
الحلم
وحده حلمت بلي واحد يجري موراها قاتلو وش تسحق؟ قالها وين عمبالي أنتي الي راكي تحلمي .
إيمان / الجزائر
ممنوع السباحة
قالك واحد دخل للشاطئ ونحى حوايجو باه يعوم، شافو البوليس قالو : ماراكش تشوف علام حمر، ممنوع السباحة، قالو علاش خليتني حتى نحيت حوايجي؟ قالو الشرطي خاطر كي تنحي حوايجك ماشي ممنوع .
عمران إلياس
الجزايري والهندي
جزايري سقسى هندي قالو : كي يموت عندكم واحد واش تعملولو؟ قالو الهندي : نحرقوه .
من بعد الهندي سقساه قالو ونتوما فالجزاير واش تعملولو؟ قالو : حنا ندفنوه برك وربي هو الي يحرقو . بن سعدة أمين / الجلفة
طيارة الرئيس
زوج حابسين شافوا طيارة فالسما، واحد قال لصاحبو : هاذي ما تكون غير طيارة الرئيس، لوخر قالو ما شكيتش، ماكاش ليموطار .
بن سعدة أمين / الجلفة
الإرهابي
واحد ارهابي فتح مطعم سماه ( فاست موت )
بن سعدة امين / الجلفة
رؤساء البلديات
رئيس بلدية جزايري سأل رئيس بلدية فرنسي قالو: نتوما كيفاش تديروا ليزافار؟ قالو: حنا في عوض ما نعملوا جسر فيه الف متر، نعملوه ثمنميات متر ونسرقوا ميتين، قالو: ونتوما فالجزاير كيفاش تعملوا للجسر، الجزايري قالو: واش من جسر؟
رضوان / عين وسارة
*
بوكريشة بوان كوم
كل من يريد مراسلة رئيس البلدية بدون بروطوكولات أو بيروقراطية وبدون انتظار أو ذهاب وإياب أو معريفة أو رشوة، السي بوكريشة يضع تحت تصرفكم بريده الالكتروني ورقم هاتفه المدونين أسفل الصفحة .
الرسايل والمسايل
الكاميرا الخفية
يا السي بوكريشة راهي ما حكماتكش الكاميرا الخفية في هذا رمضان؟
ابتسام / العاصمة
الرد : هي فالحقيقة قالولي اذا تحب تشارك أنا ما وافقتش، قلتلهم ما نعرفش نمثل .
اللحم تاع الهند
يا بوكريشة، علابالك كليت اللحم تاع الهند راني نحس روحي خفيف ...
الرد :
قلتلكم فيه أعراض جانبية، ومزال .. درك تبدى تنقز وتدارب كاراطي، وتنوضلك خانة في جبينك، وممكن تتبحر من بعد يلقاوك فاللخر نتاع رمضان .
زوجني
هايا عمو بوكريشة، آنا صغيرة فالسن بزاف، بصح والله من قلبي حابة نتزوج، واش رايك تعمل فيا مزيا وتشوفلي في دشرتكم كاش واحد كي حالتي؟؟
جوجو / حاسي . ب - الجلفة
الرد : يا بنتي فهاذ العهدة رايح نزوج الي كبار فالعمر وعندهم من الربعين للفوق، وأنت مع لعمر نتاعك ممكن تلحق دالتك فالعهدة السادسة ولا السابعة ... اذا عيشنا ربي .
الاستقبال
يا السي بوكريشة أنا نلعب فالفريق نتاع الدشرة، وراني خايف نروح لمصر نلعب الروتور، يا درى كيفاه يستقبلونا ...
الرد :
ماراكش عارف بلي مضاو اتفاقية مع ( جو زفت بغى يطير ) نتاع الفيفا انهم اذا تعدّاو على أي فريق في بلادهم يزيدو يشوفوا كأس العالم فالتلفستو .
سكنة
يا الحاج بوكريشة، راني حاب نتزوج وما عنديش سكنة، شوفلنا كاش سوسيال ولا تساهمي ولا الي جات، الله يرحم والديك .
الرد : السكنة الي راها متوفرة الآن هي من نوع محاربة السكن الهش، ابني براكة قصديرية في وسط الفيلاج نتاع البلدية يجوا يرحلوك .
فيلم جزائري
شفت فالفيلم تاع الجزاير أعصاب وأسعار واحد يهدر على الجيران ويشير ليهم بلي راهم لتحت، وقدامو تاقة تبان فيها شجرة ولحشيش، وين يسكنوا هاذ الجيران؟، والفيلم نتاع (ماد اين) كي تنجرح البوليس عالجو الطبيب، وكي ولدت مرت البوليس ولّدها نفس الطبيب، وهذاك المفتش بقالو ست شهور يخرج تقاعد، راح يعلّم المتربص وهذاك المتربص رفدت زوجتو الحمل ووضعت الطفل والمفتش مازال ما خرجش تقاعد، وكي كانو يتداربو فمقام الشهيد، ضربوا بكوتبي خرج في سيدي فرج، يرحم باباك فهمني!!!
الرد :
هاذي كذلك الأعراض الجانبية نتاع اللحم نتاع الهند، ومزال تشوف ...