واحد منهم كذّاب

الشيخ البكاي زعفان ويقول إن زياية ماعرفش صلاحو، على خاطر زياية ما يرد على البورتابل انتاعو اللي اتافيشا فيه اسم الشيخ البكاي وما يريبونديش، والشيخ البوندي يقول إن زياية رد على التلفون انتاعو وقالوا ما نلعبش معاكم على خاطر حفرتوني في أنغولا واللي راح وولّا واش من بنة خلا· وزياية يقول: ما اتصل بيا حتى واحد، لا الشيخ البكاي ولا الشيخ البوندي، وراه متفاجأ لتصريحات الشيخ البوندي والشيخ البكاي، وأحنا ما فهمنا والو·· فقد يكون الشيخ البكاي على حق والشيخ البوندي على حق وزياية كذّاب، وقد يكون الشيخ البوندي كذب على الشيخ البكاي وقالوا راني هدرت مع زياية وهاو واش قال لي، وفي الحالات فإن أحد هذه الأطراف الثلاثة كذّاب، هذا إذا ماكانوش في ثلاثة كذّابين ويجيبوا بينا في الوقت·