قانون الميزيرية

حوار مع إبليس
-شفتك في البرلمان يالنوي.
-ايه كنت في البرلمان وين راه المشكل؟
-كاش تبزنيسة؟
-يا ابليس احشم.. البرلمان مكان مقدس، مخصص للتشريع.. عيب عليك، هذا كلام خطير يعاقب عليه القانون.
-هاهاهاهاها شكون يقدر يعاقب ابليس سوى رب ابليس.
-اييه راك تعرف ربي.
-شكون قالك مانعرفش ربي، نعرفو قبلكم.
-وين هي الفايدة كي تعرفو وبشرك بجهنم؟
-هاهاهاهاهاهاها ضحكتني، علاش جهنم رايح ندخلها وحدي؟
-واش تقصد؟
-ندخلها و ندخل معايا جنودي الاوفياء، من الجنة والناس.
-يا لطيف مرات نندم لي عرفتك ومرات تقول كلام في الصميم تفرحني.
-خلينا في المفيد.. واش عجبك قانون الميزيرية؟
-قانون المالية تقصد واش بيه؟وعلاش سميتو قانون الميزيرية؟
-لأن العام الجاي تاع ميزيرية، اللهم الا شمرتو وخدمتو تمنعو اما تكملو على هذا الحال فبيننا الايام.