بلاد الحفرة والمليون حفرة

– يا النوي مبروك عليكم غير وجدلي الفال.
– علاش يا ابليس،كاش خبر زين جبتولي؟
– اييه خبر يسوى الملايين.
– قل وسلكني وخلينا من السوسبانس.
– الحكاية ومافيها يا سيدي انو العاصمة تستقبل ثاني حفرة لها في ظرف اسبوع.
– وين هاذي يا الملعون؟
– في بوزريعة، يظهر لي ان هذا العام تاع حفر.
– هاذي ما فهمتهاش.
– الأسبوع الماضي حفرة في بن عكنون واليوم في بوزريعة، والسمانة الجاية يادرى الدالة على من؟
– علاش كاينة حفرة اخرى الاسبوع القادم؟
– هاهاهاهاها وعلاش الجزائر ناقصة حفر حتى تنتظر حفرة جديدة؟ وزيد المشكلة ماراهيش في حفر الطريق المشكلة راهي في الحفرة الكبيرة التي سقطت فيها الجزائر وصعب الخروج منها اما الحفر الصغيرة فهي بالملايين، حتى انكم تستحقون تسمية بلاد الحفرة والمليون حفرة.