يوميات بطّال

قصة وقصيد

السلام عليكم، أشكرك اخي فيصل كرشوش على هذه الصفحة التي أصبحت مطالعتها هي أول شيء أقوم به خلال يومي، حيث أستيقظ من النوم أرتدي ملابسي بالطبع، ثم أنزل إلى الشارع وأترك المجال لأمي لكي تقوم بتنظيف المنزل، جزاها الله عنا كل خير وأطال عمرها وعمر كل أمهاتنا، وقدّرنا على أن نرد لهن خيرهن إن شاء الله،
* لكن حسب البرنامج الذي سأعرضه عليك، فلا أظن صراحة بانه سيأتي اليوم الذي سأرد فيه شيئا لأمي، المهم... أين كنت؟ نسيت.. مع أن البرنامج واحد ولا يتغير يوميا، والجديد الوحيد هو أني أكتب في هذه الرسالة، وأنا صراحة ليس من عادتي كتابة الرسائل، فصديقي هو من حثني على الدخول إلى مقهى الإنترنت لنراسلكم وهو يسلم عليكم، كنت أقول... أخرج إلى الشارع لأفسح لأمي المجال للتنظيف، وأول شيء أقوم به، هو اقتناء الجريدة لأفتحها في المقهى، وأطالعها وأنا أرتشف القهوة، ثم بعد ذلك نتوجه نحو "اللا شيء" الفراغ التام، الوقوف عند الحي إلى غاية الظهر، نصلي في المسجد ثم يدخل كل واحد منا إلى بيته لينام مرة ثانية، أو ليشاهد ما يقال هنا وهناك في القنوات الأجنبية طبعا، لأن قناتنا عوض أن تفيدك بالمعلومات قد تنسيك ما كنت تعرفه من قبل، المهم نبقى مع "البارابول" إلى غاية العصر، وبعد الصلاة نخرج مرة ثانية، وهذا عندما تدخل الفتيات من العمل، نخرج نحن، ربما تحتار عندما تسمع هذا الامر، نعم أخي فيصل.. البنات عندنا كلهم يعملن والحمد لله، والعجيب أنهن يجدن وظيفة بسهولة على عكسنا نحن الرجال، حيث فقدنا الأمل في هذه الدنيا، ولك هذه القصيدة لعلي أعبر بالشعر أحسن مما أعبر بالنثر.‬
* فقدنا الأمل في العمل فما العمل يا راجل، البنت في العمل والرجل هامل، احمل ولا اهمل يا خويا فيصل، انا نظل نحلل، من راجل لراجل، باش نصيب عمل، حللت الناس كامل، لكن ولا أمل، لكن ولا عمل، ولا ناقة ولا جمل، ولا زوجة ولا طفل، ولا سوسيال ولا عدل، عايش باطل عايش عاطل، وقتاش أتطل الشمس على الانسان العاطل‮!‬؟
* هذا شعر في خاطر ‮"‬الشومارا‮"‬ كامل.‬
* أخي فيصل لقد فقدت الامل حقا في وجود عمل، وصراحة هذه ليست معيشة يعيشها انسان حر، خاصة في مثل عمري لأني ابلغ الرابعة والثلاثين، فأرجو أن تنشر هذه الرسالة كما هي، خاصة الشعر الجاهلي الذي كتبته لك، وإن تكرمت علينا أنت بإحدى قصائدك فسأكون لك شاكرا، شكرا على كل حال وارجو من حكومتنا أن تنظر الينا نحن الشباب، وتوفر لنا مناصب عمل محترمة، تليق برجل مواطن حر في بلده، واقترح عليهم اعادة بعث الثورة الزراعية، وعوض أن نغني معاك يالخضرا ونشجع كرة القدم، فمن الأحسن أن نفعل مثلما فعل آباؤنا حينما كانوا يغنون "إيه بابيا... الثورة الزراعية‮"‬ فأظن أن هذا هو الحل والله اعلم، ولن أطيل عليكم كثيرا وأقول لكم شكرا مسبقا‮.‬ والسلام عليكم ورحمة الله وبركاته
* . أخوكم البطال‮ عبد الرحمان من الجزائر...‬
* ليس عندي ختم لكي أختم على الرسالة، لكن ساطلب واحدا لأني سأصبح معروفا في الجريدة اذا نشرتم رسالتي بالطبع، وكلي ثقة بكم والسلام عليكم.‬
*
أحوال وأقوال
*
* ديوان الصالحين
* مغامرات لقرع بوكريشة
* الانتخابات:‬
* بعدما تعرفنا في العدد السابق على شخصية السي "لقرع بوكريشة"، ورأينا كيف كان يمشي في الأسواق بحثا عن طريقة تدخله عالم "البوليتيك" والظفر بمقعد سياسي يمرر من خلاله أفكاره العجيبة، ورأينا كيف شاءت الأقدار بأن يصادف البرّاح، وهو يعلن عن اقتراب موعد الانتخابات المحلية، فأعجبته فكرة الترشح وراح يبحث عن الطريقة الناجعة التي توصله الى المقعد المنشود، فقرر تحضير خطاب سياسي، اجتماعي، اقتصادي، ثقافي، سياحي وزراعي، يليق بسمعته ويجلسه على عرش الدشرة.‬
* في هذا العدد، سنتعرف على الخطاب الذي حضره بوكريشة، والذي سيلقيه على سكان الدشرة بعدما استأجر البراح، وطلب منه أن يحسّسهم ويجمعهم في سوق البلدية.
*
* البراح:‬
* يا ديوان الصالحين
* يا ديوان الصالحين
* قربوا يا ولاد الدشرة
* راه ليوم كاين عشرة
* تسعة منهم كذابين
* كي يلحقوا‮ ربع‮ سنين
* أولهم السي مقران
* بين الخاوة والجيران
* والثانية لالة مليكة
* كانت تلعب‮ التشكتشيكة
* والثالث عندو‮ الڤندورة
* ما حافظ آية لا سورة
* والرابع بالقشابية
* أو أهلو كانو حركية
* والخامس بقالو شبر
* هكذاك مزال يڤابر
* والسادس جاي يرازي
* يدير بيكم ‮"‬كرام آرازي‮"‬
* والسابع عندو فبريكا
* اسرقهم وهرب لهيكا
* والثامن فالحق مرى
* راها معولة ترد الدشرة
* والتاسع تعرفوه
* نتوما تقولولو تفوه
* والعاشرمسكين حشيشة
* ايسموه السي بوكريشة
* يا ديوان الصالحين
* ياديوان الصالحين
*
* العجوز للتقنيين
* ياديوان الصالحين
* انتخبوا يا مواطنين
* باه تسمعوا هاذ النشرة
* على الكرسي متنافسين
* طول العام امخبيين
* يولو يبانوا كاملين
* ألي يشعل النيران
* ولينا متفرقين
* عضو قديمة فالسنديكة
* وكوارطها أموسخين
* أو يقلبها عند الدورة
* غير يخدع فالمومنين
* قال من عائلة ثورية
* يبيّعوا فالمجاهدين
* باه يدخل في لقبر
* كش ما بقاو مطنهين
* كيما ذاك هيتلر النازي
* ولا تعشو معلقين
* ففرانسا وفأميريكا
* ورجع يدي الباقيين
* لا حيا لا حشمة لا عورة
* طاي طاي وطاي فين
* ياك فكل عام تشوفوه
* يزيد يولّي مسلّمين
* جا يحسنلكم لمعيشة
* صوّتوا عليه يا سامعين
* يا ديوان الصالحين
* ارواحوا للسوق كاملين.‬
*
*
* الخطاب
* أول كلام سلام، وأول شي نذكرو، وأنا قدام "الميكرو"، نقوللكم أتفكروا يا أهل الدشرة، أتذكروا العشرة، والمعيشة لمكشرة، وبلي تقاسمنا القشرة، أما الان يزيكم مالبيع والشراء، وقربوا تسمعوا هاذ النشرة، الي هي فالحقيقة بشرى "وديسكور" عشرة على عشرة..
* اليوم راح نفسرلكم كيفاه توقع أمراض "البوليتيك" في تاخر الزمان هذا، يقول السي محفوظ البومباردي وبوسقراط والحكيم السي علي بن سينا و وبوكريشة... الكل اتفقنا بلي الأمراض الكل توقع هنا، فدار المير، بالفصحة البلدية، بالفرنسيسا "لاكومين" ياسيدي...
* يجي محذر ذاك "لبوازو" نتاع الشكوة، ارجع غدوة، المير راه في ندوة، على البلدية يسكانتيها، بعد ذلك تولي حوايطة كبيرة على المقر هذا "لا كومين" تديرلو "فلاماسيو"حريق يا سيدي، تتنحرق البلدية، وبعد ذلك يجي محذر ذاك "لبوازو" وين يبرك الهم؟ ها يبرك بين البرلمان والوزارة، واذا برك بين البرلمان‮ والوزارة، يطوّل كثير... والكثير وشنو هي؟..‬الجونيس...‬‮ والجونيس وشنو هي؟... الصفايرة سيدي.‬
* ياو فاقوا‮!!‬
* شكون الي قال فاقوا هذا‮!‬؟‮ فاقوا بيك ينعل والديك، خماج فا، شوف‮ ديك لفواڤر لي‮ اتدور ‮"‬فالبوليتيك‮"‬ شوف؟
* يعني اتدير فالسمير قدام المير...‬
* والله لوكان اتجي قدوة وتقولي ما لقيتش خدمة، قير نديرك فالحبس‮ نتاع البلدية، ذر فا... لا‮ حول ولا قوة إلا بالله.‬
* المهم يا ولاد الدشرة، معذرة على الشوشرة، ياو حبيت نعلمكم "تيست ويت"، بلي راني رشحت روحي "للعنتخابات"، وحبيت نعلمكم كذلك ، بالبرنامج "العنتخابي" نتاعي، هو فالحقيقة مخطط سداسي، بمعنى راح نحكملكم البلدية ست عهدات، هكذا باش تكونوا عارفين، وأنا نظن راكم موالفين، وراكم مختالفين ومتخلفين، وجيتكم اليوم باه نوحد الصفين ونلايم الكفين.‬
* قبل ما نخوض في "ميضوع" الأمن والأمان، حبيت نتكلم على "ميضوع" الجوع، لأنوا لا أمان اذا كان الانسان جيعان، ولهذا راح نحاول بحول الله نطعمكم من جوع قبل ما نآمنكم من خوف، ولهذا راني كمانديتلكم البوابر نتاع الغنم من السودان الشقيق، مازال برك بعض الأمور نسويها مع السي البشير ‮"‬اذا ما قبضوهش‮"‬، والدليل وباه نطمئنكم على الخرفان، راني كمانديت واحد البابور نتاع السرابيت، باه تمسحوا فمكم.‬
* أما فيما يخص الأمان راني قررت نقلع ‮"‬الباراجات‮"‬ نتاع الشنابيط وندير مكانهم ‮"‬الباراجات‮"‬ نتاع الماء.‬
* أما بالنسبة للعلاقات الخارجية، راني قررت نقبض الحية من راسها ومش من زعكتها، ومعول بربي ندير العلاقات مع الماريكان، ونروح معاها لأبعد الحدود، وراني راح نتصل بالسي "أوباما" لربما كاش ما عندو قش قديم يبعثهولنا، ونقولو يردلنا "السطوك أميريكا"....
* وبعد الغذاء واللبسة راها عندي عفسا باه الدشرة تولي خير من فرانسا، تولوا تخرجوا رجال ونسا، وتعود المرأة تطلق زوجها، ووممكن حتى هي الي تعود تخطبو، وهذا يسموه مخطط عقوق المرأة.
* ومازال البرنامج طويل وثري، وهاذي قير افتتاحية، ونوعدكم بالإصلاح والإصلاحية، ونقلب الحية والدعوة نردها حية، من الناحية السياحية، المسرحية، الصحية والعمليات الجراحية، الثورة الفلاحية، هات قير يعطوني الصلاحية ويردوني المير نتاع هاذ الناحية.
* واذا بغيتوا تذوقوا كل واحد يعرف صندوقو، ويعرف حقوقو، ويعرف الي يكذبوا ويسرقوا والي يخدموا و يعرقوا، وبربي إن‮ شاء الله كل واحد يدي حقو، أتفرقوا...‬
*
* نكت
* كان واحد الراجل عندو بزاف الغنم، وكان ما يصليش، واحد المرة جاه الامام ونصحو بالصلاة، وقالو بلي كي يصلي يباركلو ربي فالغنم ويزيدزا يكثروا، ايا الراجل اداه الطمع وراح يصلي ليل ونهار، بصح المشكل أنو كلما يصلي يموتلو خروف، حتى بقاولوا ربعة، من بعد ثلاثة من بعد كي بقالو واحد برك، الراجل زعف، وكي دخل للدار لقى الخروف الي بقى يبعبع قالوا أسكت ولا نصلي عليك زوج ركعات ،
* مريم عصمان
*
* مرة أستاذ قال للتلميذ: أعطيني ثلاث حيوانات زاحفة قالو: حنش، حلزون‮ وخويا الصغير.‬
* ‮ قالك واحد المرأة راحت تخطب لوليدها، من بعد سقساتها أم العروسة: ابنك يتكيف الدخان؟ قاتلها المرأة: ساعات كي يكون سكران برك
* سامية من سكيكدة.‬
*
* حكمة العدد
* الذين يعتقدون بأن المال هو كل شيء، يعملون من أجله أي شيء..‬
*
* الرد: اغتنم الصحة والفراغ
* شكرا لك أخي عبد الرحمان على هذه الرسالة، وأشكرك خاصة على القصيدة التي كتبتها، فإنها معبرة حقا عما بداخلك، وقصتك صراحة أجدها جد حساسة ولا يستشعرها إلا من تذوق طعم البطالة، فمن الصعب أن يعيش الإنسان في فراغ زمني وفقر مادي، لكن الحمد لله قد التمست في كلماتك روح الدعابة والمزاح وشعرت بانك انسان مرح كبير القلب لا يعطي الأمور اكثر من حجمها، وكذلك لاحظت انك لا تعاني من الفراغ الروحي، والدليل على هذا فقد قسّمت يومك بمواقيت الصلاة وليس بالساعات، كما يفعل الكثير من الناس، مما جعلهم يهملون صلاتهم، فالصلاة ستعينك كثيرا على حل مشاكلك وترتيب أمورك، فهي تعلمنا الترتيب.. والترتيب يعتبر أولى خطوات النجاح، أنصحك بالسعي لايجاد عمل وألا تقنط من روح الله، وألا تبقى على هذا الحال تتنقل بين المنزل والمقهى، وانما اغتنم هذا الفراغ الذي يفتقده الكثير من الناس، وأجعله في البحث عن حل لمشكلتك، وأحسن حل أنصحك به هو مباشرة البحث عن عمل تشد به ازرك، ليرى الله أنك تريد حقا العمل، او بالاحرى تبين لنفسك بانك تريد العمل، ولا يجب على الانسان أن يتكبر عموما.. وعلى العمل كذلك، فكل وظيفة تكسب منها رزقا حلالا ليست عيبا، وانما العيب في البقاء مكتوف الايدي، واذا‮ رضيت بالوظيفة البسيطة وشكرت الله عز وجل على ما عندك، سيزيدك مما عنده،‮"‬ولإن شكرتم لازيدنكم‮"‬.‬
* ولهذا أخي العزيز، عليك بالسعي ثم السعي، والنظر إلى هذه الدنيا وكأنها بحر وإلى الأيام كأنها أمواج، فإن لم نغتنم هذه الموجة ما علينا الا بالثانية أوالثالثة حتى يأتي اليوم الذي نركب فيه، ويعوضنا الله عز وجل عن كل ما فقدناه وما عانيناه وما فاتنا، أتمنى لك التوفيق وشكرا على الرسالة.
*
* العاطل والعامل
* صدر القصيدة
* نحكيلكم ياناس شي واقع صاري
* تلقى بطال مع خدام قاري
* جرى بينهم حديث باقي في فكري
* قالو‮ صباح الخير غيبة يا‮ جاري
* نطق الخدام يا‮ مجاور داري
* في ساير ليام نمشيلها بكري
* أنايا ومهم وثلاثة ذراري
* مرات في لسواق في حاجات شاري
* ووقات نديهم يمتعو لنظاري
* وأنت أحكيلي قل لي يا‮ جاري
* تحسر البطال قالو لو تدري
* نحكيلك همي تفهم تحساري
* في كل يوم صباح نخرج من داري
* نبقى غير نهوم وانا ما‮ داري
* وجيوبي فارغين زادو ضماري
* وزاد لكريدي طيحلي قدري
* نتفرج فالناس لي تبيع وتشري
* من هاذ الشوفات رشات أبصاري
* نقعد نتحسر نبكي على زهري
* شي من مرات نوضلها بكري
* فاليد ملفات‮ وانايا نجري
* كاين ناس حرام شوشولي فكري
* ساعات نتقلق ينفدلي صبري
* وساعات نخمم نفسد في كبري
* من بعد‮ نستغفر‮ نتفكر‮ قبري
* عندي ما مريضة وانا في فقري
* نونسها بكلمات يما أصبري
* كي نشوف معاها يتهول فكري
* تجي لحنينة تقعد بجواري
* نتبسم لناس كاتم أضراري
* نحكيلك ضري تفهم يا‮ جاري
* نعرفها من زمان كي كنت في صغري
* خممت نخطبها باش تطفى ناري
* قلت نقصد الدار ونجرب زهري
* كي خممت مليح غيرت أفكاري
* واش رايح نحكي نشكيلهم فقري
* واش‮ رايح نحكي نحكيلهم ضري
* خايف نبقى هك يتودر عمري
* لا دار‮ لا دوار‮ لا مرا‮ لا دراري
* نصبر لله هذا هو‮ قدري
* نطق الخدام قالوا يا‮ جاري
* كي حكيتلي همومك زعزعت أفكاري
* الله يرزقك رب الأقدارِ
* ربي حنين كريم وانتايا داري
* وجبذ عشرين ألف قالو ياجاري
*
*
* ***************‬عجوز القصيدة*******************‬
*
*
* نعيدلكم هموم ناس غرقت فيها
* في يوم من جمعة في وحد الجهة
* والقصة في بيات ليكم نحكيها
* الجورة يلزم نسقسيو عليها
* عندي غير ساعات نريح فيها
* والذراري لمسيد أنا نديها
* أنا نوكلها ونزيد نكسيها
* مرات تمرضلي ندي نداويها
* نحوس بيهم وشحال من جهة
* إيامك كيفاه تعقب فيها
* إيامي كيفاه راني نقضيها
* وحياتي لموات تنوح عليها
* والله ما‮ نعرف واين نعطيها
* من حومة لحومة كامل نفليها
* حاير في قهوة سخفان عليها
* والناس لي تسال نخاف نلاقيها
* وانايا خبزة ما‮ قدرت نشريها
* وكرهت الدنيا وجميع ما‮ فيها
* وهمومي بزاف لو‮ كان نحصيها
* نحوس عالخدمة ما‮ نخلي جهة
* ما‮ نخليش مكان ناسو نوصيها
* قالولي بالرشوة تحصل عليها
* لو نلقى حرڤة والله نعطيها
* نتاجر فالكيف خلي نخليها
* أنا ولد حلال ما ناظتش عليها
* تنازع فاليل باش نداويها
* والدمعة فالعين منها نخفيها
* نبكي وندعيلها ربي يشفيها
* والحزن يترسم في سواد عينيها
* في قلبي نيران واش يطفيها
* كاينة بنت حلال ناوي نديها
* صعيب علي الحال باش نخليها
* خفت واحد آخر إيجي يديها
* قلت ربي رزاق خلقو يغنيها
* قلت ما‮ يقبلوش يرفضو والديها
* والا بالكذب أقوالي نمليها
* والا البطالة اللّي راني فيها
* هاذي شحال سنين وانا ملاويها
* ولي مكتوبة نعديو عليها
* ايامي هكذا‮ راني‮ نقضيها
* راك على جمرة عافس عليها
* صابر وساكت صدرك خافيها
* وعبادو‮ محال هكذا يخليها
* والناس لي صبرت هو يعطيها
* شد وما‮ تحلفش تقهوى بيها
*
*
* عبد الجليل من قسنطينة‮
*
* إعلان :‬
* ترقبوا بداية من شهر رمضان المبارك أركانا جديدة ومتنوعة ستدخل على الصفحة، ويمكنكم المساهمة في إثرائها بأفكاركم واقتراحاتكم ومشاركاتكم عبر وسائل الاتصال‮ المدونة أسفله.‬
* مسابقة أحوال وأقوال:‬
* كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها، أو صور غريبة ويريد نشرها في الجريدة للمشاركة في مسابقة أحوال وأقوال والفوز بجوائز قيمة، جريدة "الشروق" تضع تحت تصرفكم وسائل الاتصال المدونة أسفله.