الإدارة في الدشرة

نظرا لموجة التلاعب والتجاوزات الادارية التي طالت (السي لقرع بوكريشة) رئيس البلدية، بسبب لغته المبهمة وثقافته المحدودة، كونه لا يتقن الا الدارجة الممزوجة ببعض المفردات الفرنسية التي يستعملها في خطاباته السياسية، بصفته خرّيج (مدرسة السوق) التي مكنته من الظفر بمقعد سياسي وولته على عرش البلدية.
*
وفي ظل التطورات الحاصلة وجد نفسه في (حصلة) كون معظم العمال والمتعاملين معه في البلدية يتعاملون بالحيلة والتلاعب بالوثائق والصفقات، فبات ضحية لشرذمة من المفسدين يمضونه على وثائق يجهل تماما محتواها، فأصبح مطالبا بالتعلم و(التعولم) من أجل تحسين مستواه الدراسي، ومواكبة العالم السياسي، وتعلم الخطاب الدبلوماسي أو بالأحرى لغة الكراسي للتواصل مع الناس وتوصيل الأفكار الى اكبر عدد ممكن منهم، ومن أجل هذا كله، قرر السي بوكريشة البداية من الصفر، فاستأجر معلما خاصا للغة العربية ليقدم له دروسا خصوصية عسى أن يستدرك ما فاته ويقضي على أميته ويحقق أمنيته المتمثلة في التطلع الى ارضاء الخاصة والعامة والاطلاع قبل الامضاء على الأوراق والوثائق الهامة، فأرسل البراح ليجمع الناس في ساحة البلدية من أجل الاستماع والاستمتاع بأول خطاب سياسي دبلوماسي يلقيه بوكريشة بالعربية الفصحى ويكشف فيه بعض التجاوزات الادارية .
البراح
*
يا ديوان الصالحين يا ديوان الصالحين
يا ديوان الصالحين على ربي والوالدين
سلام يا أهل الدشرة اسمعوا هاذ النشرة
بوكريشة راهو يقرى ألف باء سين عين
راه معول من ذا الصبحة باه يقلب يمات الصفحة
ويولي يهدر بالفصحى باه تفهموا كاملين
وراهو جاب الاستاذ يعلّملو لغة الضاد
هو الاول فلبلاد وهو قرّى اللولين
قراو عندوا الرؤساء والحكام الوزراء
علملهم لآليف والباء بعدما كانوا حاصلين
كانوا ينصبوا المرفوع و المرفوع عشى موضوع
تسمعهم تبقى مخلوع تقول عليهم حابسين
بين ليلة ونهار تسقموا وعلى يدّو الكل تعلموا
عادو فالصحة يتحكموا ولاو كامل قاريين
وعلى هذا السي لقرع باش ما يزيدشي يتنخدع
باه ما يزيدشي يتنخدع كيما تخدعوا السابقين
كان يمضي على لورق المشبوهة وماشي فايق
هذا يخطف هذا يسرق وعلى ظهرو عايشين
وليوم جابلكم خطاب بالعربية فالكرطاب
فيه المحو والاعراب حتى الصرف او كاينيين
يا ديوان الصالحين يا ديوان الصالحين
يا ديوان النايضين ايبلّغوا الراقدين .
الديسكور
بعدما فرغ البرّاح من عملية جمع السكان في ساحة البلدية، خرج اليهم السي بوكريشة وكله عزم ونشاط وثقة بالنفس، فتوجه نحو المنصة حاملا كراسته الجديدة وشرع في إلقاء الخطاب .
السلام عليكم وأهلا بكم يا أهل الدشرة، اليوم... قررت... توسيع لغة الخطاب، من أجل فتح الأبواب، وتوصيل الرسالة الى كل الأقطاب، وكذلك من أجل الاطلاع على الوثائق قبل الامضاء، واكتشاف حقيقة بعض الاعضاء، أو بالأحرى الأعداء، من مسؤولين في (المزلش)، وجدوني أمي لا أجيد العربية، فأرادوا ان يلعبوا بيا، وحسبوني عبيط، وصاروا يطبعون لي الكواريط، ويمارسون معي التبلعيط، ويسرقون حق الزوالي البسيط، فقررت ان أتبع الخيط، فوجدت الدعوة مخلطة خليط، وبعد ...
أولتها السكن الاجتماعي، وجدت المساعد نتاعي، الذي كان راعي، فجعلته ذراعي، إذ به يجبدني من كراعي، وحسبني لست واعي، فراح يسربي السكن الاجتماعي، لأصدقائه الأفاعي، أصحاب الأطماع، الذين لديهم المتاع، فزاد للبحر بعض القراعي.
ثانيتها... قطع الأراضي ومورسوات التراب، عوض أن تستغل في القطاع الزراعي، وتتسربا للشباب الذي هو في الضياع، من أجل غرس البطاطا والكانطالو والدلاع، وبالتالي الانتفاع والإشباع والقضاء على الأسعار التي هي فارتفاع، والقضاء على البطالة والسرقة والتقطاع، والقضاء على الانتحار الجماعي، والحراڤة في القارب الشراعي، فقد وجدت قطع الارض تتسربا أرض أرض بالتخفي، تحت الطاولة لأصحاب الأكتاف، والأعراف، من أجل بناء الفيلات في الأرياف والقصور بكل الأوصاف، والمصانع من كل الأصناف، فالمرفه يزيد في التتراف والاسراف، والفقير الغير كافي، مشتاق يشرب كافي، ويمشي حافي، محروم حتى من الطرولي، ومن حقه في البطرول، فاين هو الكونطرولي؟؟؟
ثالثتها... الشغل والشوماج الذي جعل الشباب يعيشون الديڤوطاج، محرومون من البريكولاج، محكومين أوطاج فالحيطان تاع الفيلاج، فاقدين الامل والكوراج، ومحرومين من الزواج والمارياج، جيبهم خالي، لم يجدوا عملا رغم التحلال، ومناصب الزوالي تذهب الى ابناء المقالي، أصحاب المعريفة والتوكال، والرشوة والتدلال، والعشق والجمال، والميني والسروال، والزاولي، الي ما عندوش الوالي، كيما حالكم ولا حالي، يبقى ديما هو التالي .
رابعتها...الطرافيك، الذي أصبح قدام عينيك، يسرقون مال الشعب بلان بوبليك، بصفقات وهمية يطمعوا فيك، وأنت راقد على وذنيك، وهم يسرقون في الشركات ويخبئون الفرنكات في البونكات، ويعيشون بالماركات، وأنت... الى متى هاذ السكات؟؟؟
ولهذا قررت بداية من اليوم ان اراقب كل التحركات، ولا أمضي الأوراق والشيكات، حتى أطالعها بثبات، وقررت أن أقرأ العربية، لكي لا يلعبون بيا، وليست سهلة المسئولية، وربي راهو يشوف فيا، فأقسمت على أن لا أعمل بالنية، في وسط الحيلية، وأن أصبح مزندق مثلهم وسأحاسبهم في الدنيا قبل الآخرة، وفي الاخير أقول لكم يا وجوه الخير، لا تقنطوا من رحمة الله فالدنيا ما زالت بخير، بكم انتم يا وجوه الخير، أما وجوه الشر، فسوف يحاسبون عند رب البشر، على كل هذا الفساد الذي انتشر، وعلى قلب الفقير الذي انكسر، وعلى العائلات النائمة على الأرصفة تحت الحر والمطر، فوالله كل شيئ فعلوه قد نشر، في كتاب محفوظ ليوم الحشر .
*
قصة وقصيد
يمكنكم المشاركة في ركن (قصة وقصيد) للصحفي فيصل كرشوش الذي يستقبل قصص القراء بما تحمله من هموم وانشغالات ويحولها بدوره الى قصائد شعرية، ويفتح لكم المجال من أجل المشاركة بنصائحكم وتجاربكم وأفكاركم وقصائدكم الشعرية لمساعدة الآخرين ورفع الغبن عنهم.
" محمد " صلى الله عليه وسلم
بعدما تابعنا في العدد السابق الجزء الثاني من القصيدة المحمدية التي تختصر قصة خير البشر سيدنا محمد صلى الله عليه وسلم، والتي نستعرض فيها بعض مناقبه وشمائله ومحطات من حياته الشريفة عليه أفضل الصلاة وأزكى التسليم، وهي قصيدة من أربعة أجزاء، سنتابع في هذا العدد الجزء الثالث من القصيدة .
القصيدة المحمدية
الجزء الثالث : التآخي والمجتمع المدني
في تراب يترب حط رجلو ريّح شويا من تعب السفر
أول شي قرر يعملو يبني مسجد قباء لمنور
وبدى يعلم الناس يصلوا و يتعاونوا عالتقوى والبّر
كيف كيف يسكنوا وياكلوا كل مناصر مع مهاجر
وكل واحد فيهم عطالو حقوا كان غايب ولا حاضر
وكان الي يجي عندو يسألو يجاوبو ويفهّمو قدّما يقدر
حتى الناس كامل ينالوا وهو يبقى دايما اللّخر
ولو انو ربي وحالو وخبّرو بأنو خير البشر
الّي ماكانش حاجة بحالو سيدنا محمد كان قادر
يدعي الله يزيد في مالو كيما كانو كسرى وقيصر
ويزيد يحكم العالم بكمالو وفي كل مكان يجعلّو قصر
ويحطلو الشمس فشمالو وفي يمينو يحطلو لقمر
هو بالعكس ما طلب والو من غير انو يهدي ويبشر
ويعلّم الناس الي جهلوا ويوريلهم الخير والشر
والعز والخير بالنسبة لو رايح يلقاهم فالعالم لاخر
بن الخطاب مرة سألو كي شافو راقد عالحصاير
مجروح ولتم دموعو سالو وقالّو بالله غير راني حاير
كيفاه لملوك راهم يتكسلوا الخير عليهم ساير داير
عزّهم انت الي تستاهلو يا رسول الله تستهل كثر
لتما سيدنا محمد قالّو أولا ترضى يا عمر
انهم هوما فالدنيا يتكسلوا واحنا نتنعموا فالعالم لاخر
من هاذ الدنيا ما ادى والو كان في كرشو يربط لحجر
مكثر الجوع وما يقول والو حامد ربي فكل شي وصابر
وحتى بعما خرّجوه أهلو ومن بلادو راح وهاجر
تبعّوه وبداو فيه يقاتلوا مرة فالصدر ومرة فالظهر
منعوه من بيت الله يدخلو باش يحجّ ولاّ يعتامر
هكذاك وصبر وما قال والو وبالنسبة ليه كان يفكر
يبني مجتمع مكانش بحالو لا فالأول ولا فالأخر
ومادا بيه الناس ينالوا فهاذ الدنيا وفالعالم لآخر
يتبع ...
كل الحقوق محفوظة
مسابقة ناس الدشرة
كل من لديه نكت من الواقع الاجتماعي، أو قصائد هزلية وطرائف، أو حوادث مثيرة عاشها،أو صور غريبة ويريد نشرها في الجريدة للمشاركة في مسابقة ناس الدشرة والفوز بجوائز قيمة، لقرع بوكريشة يضع تحت تصرفكم وسائل الاتصال المدونة أسفله.
نكت
واحد حابس
قالك واحد حابس حل مطعم كي تلحق الساعة ثناش يسكّر ويروح يتغدى في دارو .
معايشية امينة / مسيلة
عقاقري
قالك واحد عقاقري راحت ليه عجوزة قالتلو اعطيني شويا مسامر، كي عطاهملها ما حبش يخلص عليها، قالتلو : روح يا وليدي نشا الله تلقاهم في قبرك .
معايشية امينة / مسيلة
السي مبروك
كاين واحد السيد إسمو السي مبروك، كي كان قريب عيد الأضحى راح اشترى كبش ما شاء الله، وكي جابو للدار ودخلّوا قالتوا جارتو تسكن فوقو : مبروك الكبش، قاهلها خيرا البقرة ( حسبها تعيب فيه ) .
رابح jsk
كبش سون سمير
قالك واحد شرى كبش وجا يسحب فيه، والسيد مسكين يسكن في عمارة، أيا الكبش ما حبش يطلع، الراجل بد يعيط لخاوتو يعاونوه عيسى موسى قدور... الكبش دار ليه وقالو واش بديت تدير فالسمير راني طالع وحدي.
محمد بومرداس
*
رئيس دولة عربية
استدعى رئيس احدى الدول العربية وزيره للداخلية وراح يطرح عليه بعض الاسئلة وعن مدى حب المواطنين لفخامته، فأجابه الوزير بأن الشعب يحبه والدليل على ذلك انهم يصفقون عليه كلما ذكر اسمه، فسأله الرئيس ما ان كانوا يرغمونهم على التصفيق، فأجاب الوزير بلا وبأنهم يصفقون بمحض ارادتهم، فأراد الرئيس أن يتأكد بنفسه، فتنكر بلباس أعرابي ودخل وسط أحد التجمعات، وعندما ذكر الرئيس راح الجميع يصفق بحرارة كبيرة، ففرح الرئيس، وفجأة جاء اليه شرطي وقال له: وأنت لماذا لا تصفق يا خائن...
بن سعدة محمد أمين / الجلفة
*
القائد الصارم
كان قائد صارم يمر بصفوف الجنود فسأل أحدهم يدعى أحمد: يا جندي ما هذا الذي في يدك؟ فقال الجندي: هذه بندقية يا سيدي، فقال القائد: ليست بندقية يا غبي بل هي زوجتك، فانتقل الى الجندي الذي أمامه وقال له: ما هاذه التي بيدك؟ فرد الجندي: إنها زوجة أحمد يا سيدي...
بن سعدة محمد أمين / الجلفة
بلد متخلف
اقترح أحد الوزراء في بلد متخلف على رئيسه قائلا : ما رأيك لو نجعل بلدا متقدما مثل أمريكا تستعمرنا، فتبني لنا المصانع والمستشفيات والمدارس ثم نطردها في الأخير، فأجابه الرئيس : وكيف نجعلها تستعمرنا؟
بن سعدة محمد أمين / الجلفة
بوكريشة بوان كوم
كل من يريد مراسلة رئيس البلدية بدون بروطوكولات أو بيروقراطية وبدون انتظار أو ذهاب وإياب أو معريفة أو رشوة، السي بوكريشة يضع تحت تصرفكم بريده الالكتروني ورقم هاتفه المدونين أسفل الصفحة .
الرسايل والمسايل
السلام عليكم .. ان شاء الله تكون مليح يا السي بوكريشة وماشي مدمر كيما انا، على خاطر عندي 6 دراري وامهم ولا خدمة لا قدمة وزاد دخل علينا العيد، راني حاير لو كان غير تشوفلي كاش خدمة عندكم
مختار / تيارت
الرد :
يا خويا المختار، راه ربي ختارك بهاذ الابتلاء كيم اختارني أنا بهم البلدية، ولازم الواحد يصبر وما يقنطش من رحمة رب العالمين، وولادك وزوجتك ونفسك كذلك ما تتقلقش عليهم، لأنك ماشي انت الي خلقتهم، والي خلق هو الي يرزق، وربي سبحانو وعده حق، ماشي كيما انا رجل سياسة والوعود نتاوعي ما نظمنلكش .
السلام عليكم : ياسي بوكريشة، كل يوم نقراو في الجورنان إختلاسات، رشاوي وصفقات مشبوهة، بقينا أنا وأنت فقط لم نخض مع الخائضين؟
ح . ع صالح / العاصمة
الرد : كاش ما خلاولنا حاجة ندّوها؟، حنا حقنا وما ديناهش كيفاه ندّوا حق وحداخر؟؟
فقر الدم
علابالك يا سي بوكريشة وين ما يزودو في لي بريم للعمال التجار يزيدو فالسلعة وغير الزوالي اللي مطفرة فيه ومن كثرة الهم عادت عندنا بونسيو جديدة اسمها فقر الدم، واش من سيستام يخرج علينا يا سي بوكريشة؟
عادل / تبسة
الرد : نعملوا سيستام فليكسي، خاطر فقر الدم كيف البورطابل نقدروا نترافدوا بيناتنا ونفليكسيو لبعضانا، ياو المشكل في فقر الايمان الي كيف الفيكس .
ليزافير
يعطيك الصحة يا السي بوكريشة، راك نحيتلنا على قلبنا، صحا رمضانك وسلملي على ناس الدشرة، ومادابيك تشوفلي كاش خديمة معاك باش نديروا ليزافير كيما راهم كامل .
عبلة / العاصمة
الرد : ليجافير ... تعرفي ليجافير نتي؟؟ لوكان تلهاي بليزافير نتاوعك وتطلي على الشربة بالاك تحرقت ماشي خير، موفيسا فا ...
فريق الدشرة
يا السي بوكريشة، حبيت نكون في فريق المحترفين نتاع الدشرة ماشي المنحرفين، شووفلنا كاش بلاصة صحا .. محمد / الجزاير
الرد : نو نو ... قلتلكم بلي المحترفين غير نتاع ليمبورطاسيو، أنت نحطك مع الفريق ( ب ) الي يلعبوا بالدماغات .
لماذا لبليدة
يا السي بو كريشة، لماذا قرر سعدان اللعب في البليدة عوض خمسة جويلية؟
الرد : خاطر هو ناس ملاح ويخمم علينا و خاف كاش ما يصرالنا، امالا حب يقسم القنطة بين العاصميين والبليديين وغدوة ما نعرف وين؟؟؟ .
جلسات الاستماع
يا السي بوكريشة راهم يقولوا بلي راك زارطيت من جلسات الاستماع، صح والا نو نو؟؟؟
الرد : أنا خلاوني اللّخر باش نكشف كامل الي سمعولهم من قبل .