تضمن التغطية الرياضية المتواصلة للأحداث الرياضية في قناة (ما عندناش وما يخصناش)، أوفدنا مراسلنا الذي يحب كثيرا الأطباق الصينية في رمضان إلى نادي الجيش ببني مسوس من أجل حضور تكريم المتأهلين في أولمبياد بكين، فلمح عند الباب الكثير من الرياضيين الذين ظنوا أن الأمر يتعلق بتوزيع شقق وسيارات على جميع الناس، خصوصا عندما عرفوا أن الحفل يحضره أيضا جمال ولد عباس ! في المنصة الشرفية، صعد أولا بطل الجيدو عمار بن يخلف وأخذ الميكروفون ليقول (والله راني فرحان بزاف ونقول الله يخلف والعقوبة للي رايهم تلف عن الفوز بالميداليات ورجعوا للبلاد بالهف..) وهنا لمح مراسلنا في الحفل أن الجميع كانوا يتبادلون الأنظار حول هوية من يقصد صاحب الميدالية الفضية في الألمبياد، وانتظروا حتى صعود زميلته في الانتصار، صورية حداد التي صرعت منافستها وكأنها بنت عنتر بن شداد، وقالت في ميكروفون النشرة..( أنا تاني راني فرحانة بزاف بالجائزة نتاع السيد براف، ولكن يا ريت كون زادوني شويا ذهبات على السيارة والشقة، هكذا باش نتميز شويا على زميلي بن يخلف نتاع الله يخلف).. جميع الحاضرين في الحفلة حسب تقرير مراسلنا كانوا مندهشين من تصريحات البطلين، حتى صعد جمال ولد عباس إلى المنصة ليقول..( يا جماعة، يليق تعرفوا بلي السياسة الرشيدة نتاع فخامة الرئيس هيا اللي عطاتنا في نهاية الأمر هاذوا الأبطال، وأكيد هوما راهم فرحانين ومساندين العهدة الثالثة من أجل حصد مزيد من الميداليات في الألمبياد المقبلة)! السيد مصطفى براف انزوى في مكان بعيد وقال لمراسلنا في قناة ما عندناش وما يخصناش..(والله يا خو كون عرفت بلي الحفل يفوت هكذا مسوس ما نديروا في بني مسوس ولا على الأقل ما نعرضتش جمال ولد عباس...العبوس)..حاولنا الاستفسار من رئيس اللجنة الألمبية عن السبب لكن السيد براف اكتفى بالقول..( والله بزاف يا خويا بزاف) !
