قصيد الملحون

فارح بضيوفي


فارح بضيوفي و حامل كاس غرام....... و تمنيت مع حْبابي نقسمو
البيضا للخضرة تعاود ألف سلام ..... و سلام بلادي بلشواق نضمو
أنا شاعر ف الهوى نبكي لرسام ...... وننتحر ف راس من فينا وهمو
جبت سلام الغالية و نرد سلام ....... نزرع وردي هنا وف الشام نشمو
واش عشق من لاعشق في سحر الشام.... وانا نجهر بحبها ما نكتمو
الأردن رمز العروبة فرخ حمام........ والإمارات لقوافي الشعر نغنموا
الجزائر و المغاربة ف الدم توام ...... و في الوحدة همتنا ديما تسمو
الجزائر و ليبيا قُربى و ارحام ....... ذوك الحدود في الخواطر ينهدمو
جيت نفسر فيك يا بيروت حْلام ...... ساعة صبت الحلام ف الصح يلمو
بيروت الشعر سماها دار غْمام ...... و شوارعها تقول بالسحر ترسمو
على قدس الأمة ثقيل بغير كلام ....... شغلوني شفايف الحبيبة كي يكمو
تعبني ليل العروبة كي يظلام ........ و تعبني شوقي للأطلال تهدمو
أم الدنيا تقوللي عاشق لوام ......... و عيونك بالشك فيا يتهمو
قلتلها دام الوفا في الدم دوام ......... و انتيا فسري ضنوني كي هجمو
سايح بين دروب عشقي و التخمام..... متعلق بغصان رحمة ما رحمو
ليا أمنية ها هوا دار العام ......... ناس الحب مع احوالي ما قسمو
قلت نحلق في دزاير فرخ احمام .... حامل مراسيل بالحب تختمو
نقللها في حماك نبني عز مقام ...... نعيد عليك جراح في قلبي يدمو 
و الله ما حبيت غيرك في لريام ...... وانتيا رياح الهوى منك صمو
ساحل بحرك كل يوم يجيب غمام ..... عز قصايدي و قلبي ضمو 
انا وطني مقدسو قيمة و عْلام ...... مهما كان و صار محال نذمو